寸王盃仔唔興大炒

猪拉多纳

半力開車入球細當「保」

開季至今仲未輸過嘅車路士，今晚喺英格蘭聯賽盃第3圈主場鬥保頓。講卡士，保頓食塵都追唔到藍戰士，但車仔領隊莫連奴不嬲實際至上，只求出線不求大勝，半力出擊未必大數對手，既然入球中位數升到3.5球，1.85倍入球細可以一試。

（開賽時間：周四凌晨2:45）
保頓少大敗收場

車路士季初做咗英超風頭躉，全賴一對新兵迪亞高哥斯達、法比加斯大爆發。不過成季流流長，相信寸王都唔會咁快用殘佢哋，預料今晚會收起班主力，包括有傷嘅拉美利斯。雖然話後備鋒將雷米、穆罕默德沙拿等人戰鬥力唔差，但對住一心死守嘅保頓隨時老鼠拉龜。事實上，睇番車路士上屆踢咗6場本土盃賽，冇一場入多過2球，證明佢哋喺盃仔比賽冇乜大炒癮。

無疑對手保頓表現的確頹爆，開季10戰得1勝，不過佢哋除咗聯賽首戰作客屈福特吞3蛋外，就冇再試過大敗收場。講真保頓都知自己牌面弱幾班，今次造訪史丹福橋球場仲唔擺定鐵桶陣迎戰咩，半力出擊嘅藍戰士唔似話炒就炒囉！