歐聯病毒玩殘畢爾包

猪拉多纳

下周中歐聯又開波，今個周末要特別小心「歐聯前綜合症」，西甲球隊屬於高危區，事關強隊讓得好辣，最終好可能出現贏波輸盤甚至失分。畢爾包已成為被狙擊對象，呢班波人腳質素有限，根本冇能力兼顧聯賽及歐聯雙線作戰，今季戰績走晒樣，似足當年嘅馬略卡、貝迪斯。畢爾包前景難樂觀，今晚主場讓唔起伊巴。

（周日凌晨4時開賽）

西甲水準高，好大程度上因為巴塞、皇馬、馬體會喺歐洲賽超班演出，令外界高估整個聯賽其他球隊嘅實力。

大膽講句，西甲亦只有呢三隊能夠兼顧兩大戰線，以往有「老四」出戰歐聯，結果拖垮聯賽成績，最明顯例子就係01/02年度嘅馬略卡，以及05/06年度嘅貝迪斯。

畢爾包今季似有步其後塵之勢，聯賽五戰輸四場，已經係上季敗仗數字嘅一半，退步速度驚人。今仗讓伊巴一球、球半實在過晒火。新升班嘅伊巴表現唔錯，球員踢起上嚟好有鬥志、夠硬淨，之前對住馬體會都係僅輸一粒，近兩場仲攞到四分，受讓下盤值博。
巴塞飄忽吼準就反

另外，巴塞隆拿今季水準好飄忽，一時大勝、一時僅僅熟，上仗同馬拉加互交白卷，累死好多上盤及大盤客。佢哋下周中歐聯仲要硬撼巴黎聖日耳門，今輪西甲主場對CF格蘭納達，讓到兩球半嫌多，寧願揀下盤。

（now 632周日凌晨零時直播）