當疲勞仁遇上細路隆

猪拉多纳

班霸拜仁慕尼黑今晚作客鬥科隆，拜仁近期處於魔鬼賽程，頻繁比賽令多名主力球員出現疲勞反應，面對全德甲最守得嘅「細盤王」科隆，大炒對手機會唔高，建議追有2.19倍好分頭嘅細盤。

（有線64及203台周六晚9時30分直播）

拜仁周中大勝柏達邦，主要原因係對手並非一支密集防守嘅球隊，但拜仁贏波亦唔算好輕鬆，皆因近期比賽實在太密，球隊自本月18日歐聯對曼城起計，到下月4日德甲對漢諾威，要喺17日內踢6場比賽，平均少過3日踢一場，難怪教練哥迪奧拿詐晒型，話咁嘅魔鬼賽程會殺死球員，周中比賽就有中堅謝路美保定同箭頭羅拔利雲度夫斯基，因為肌肉輕傷需要提早退下火線，兩人都要接受治療，相信哥帥唔敢用得佢哋太盡，事關拜仁本身已傷兵滿營，踢完今場作客，又要立即啟程去俄羅斯，應付3日後作客莫斯科對中央陸軍嘅歐聯賽事。拜仁喺德甲畢竟已經重返榜首，既然死敵多蒙特近期頻頻失分，球隊可以將更多注意力放喺歐聯。
科隆細盤長路未斷過

科隆剛周中畀漢諾威打破今季不敗同不失球嘅金身，但作客僅負0比1，仍然保持今季德甲全細盤好路，球隊嘅嚴密防線喺上半場百密一疏失波後就再冇犯錯，不過教練史杜加喺前線不斷變陣，無論用安東尼烏查、大迫勇也定西蒙祖拿，都冇法子追得番，皆因佢哋中後場球員嘅傳球欠缺質素，所以雖然經常踢到個波上前，但前鋒球員好難攞。今晚主場面對班霸，史杜加又會用番佢拿手嘅龜縮戰術，就算失咗波都唔會強攻，想入拜仁波好難，但被大炒嘅可能性亦唔高。