愛華頓棄聯賽盃體能秤先

猪拉多纳

因為下周中有歐洲賽，今個周末英超特別熱鬧，所有強隊齊齊亮相。除曼聯以外，幾支強隊都要為歐洲賽稍為留力，預計車仔仍可憑「下半場發功」嘅戰術小勝維拉，但曼城作客侯城就隨時大手交易，藍月亮甚至或失分而回；至於韋斯咸新舊融合漸入佳境，今周對曼聯有力乘勝追擊。

（now621台周六晚10:00直播）

另一紅衫球隊利物浦開季亦未見得好過死敵曼聯幾多，中場控制能力明顯跌Watt，呢個當然同隊長謝拉特年紀又再大一歲有關。觀乎今季英超年屆34、5歲嘅非門將球員，例如林柏特、杜奧巴同里奧費迪南等都唔使應付一周3賽，但謝拉特就打足開季頭6仗，領隊羅渣士唔學得柏歷堅尼識「錫住」林伯嚟用，遲早用殘神奇隊長。
「巴神」首戰打吡 控制情緒勝負關鍵

拖肥糖上季緊守頭5位成功取得歐霸盃入場券，主要靠穩健防守，係失球第3少球隊。雖然今季後防人腳冇大變動，但就變為失波最多嘅一隊，老門神侯活今季偶有失準此其一，板櫈深度不足此其二，因此教頭馬天尼斯周中放棄聯賽盃實屬明智，令球員喺今晚打吡戰體能先佔優勢。打吡戰向來氣氛熾熱，「巴神」首度參戰可唔可以控制情緒，係利記勝負關鍵。

（now621台周六晚7:45直播）