韓日宿敵怕輸 半場和好路

猪拉多纳

亞運男子足球8強爆發「日韓大戰」，呢場唔只係足球咁簡單嘅對碰，東道主南韓同宿敵日本都背負住唔衰得嘅壓力，想贏怕輸，前45分鐘開唔到紀錄好正常，一於博2.05倍嘅半場和。

（有線61、201周日下午4:00直播）

日韓公認係世仇，牙齒印唔少得過中日之間，今日兩隊响文鶴競技場交鋒，正如南韓亞運隊隊長朴柱昊咁講：「韓日戰內裏意義極大。」正因為咁，南韓方面呢兩日都加強咗日本隊嘅保安，平時練波只派兩、三個差人睇住，前日起就有成10個警察陪住日本仔，基於兩隊都孭住國民期望沉重嘅面子壓力，真係少啲膽汁都可能自己腳軟。
南韓爭金壓力大 沉迷穩中求勝

從分組賽表現去睇，南韓佔盡天時地利人和，但表現唔係想像中咁好，攻擊力唔講得叫銳利，箇中原因除咗攞金牌嘅壓力好大，主帥李光鐘喜歡打防守反擊，沉迷响年幾前佢帶南韓U20打入世青盃8強嗰套穩中求勝嘅戰術，令呢支U23「太極虎」冇乜霸氣。中場尹日錄膝傷離隊，「高佬」金信煜又脛骨有傷，更加削弱南韓左路側擊同高空攻勢，16強對香港苦攻半場冇收穫，就睇得出問題所在，難怪韓媒都話今場勝負，好取決於金信煜係咪復出？復出嘅話又有冇水準表現？
日本U21孭飛平常心

衞冕金牌嘅日本壓力冇咁大，畢竟佢哋只係派出U21應戰，又無超齡球員幫拖，主力後衞西野貴治又跛埋退隊，經驗方面肯定蝕底。而且响亞運歷史上，南韓對日本有5勝1負嘅往績，日本班o靚仔輸好正常，所以佢哋都抱住平常心，中場大島僚太就講明只會諗點樣踢出自己家波，唔會想太多其他嘢。

由於心態上嘅差異，日本今日可能比南韓踢得稍為放一啲，不過南韓班人經驗老到過佢哋，又爆晒響口要凍結日本頭號王牌鈴木武藏，可以預見日本將會面對極度體力化嘅中場壓迫，接戰初期好易出現僵局，半場打和非常正路。
盤路解碼

南韓男亞足今屆4戰全部開半場細。
南韓4戰入9球

南韓男亞足連續3屆入4強，先後2次得銅牌。

南韓男亞足今屆4戰入9球、冇失波。

日本男亞足近3屆2次入決賽。

日本男亞足近3屆出戰亞運足球賽得14勝2負。
太極虎硬淨玩入球細

東道主南韓同上屆冠軍日本8強碰頭，簡直係將決賽提前上演，不過各位鍾意睇入波嘅球迷，今場未必睇得過癮，因為南韓今屆未失過波，保持一貫硬淨作風，玩入1.72倍球細好過。