北韓精神力量攻無不克

猪拉多纳

女足4強 兩韓對決

亞運女足4強上演南北韓大戰，兩國政治、男足實力，南韓或秤先，但講到女足水平，北韓高一班，身體質素勝一籌之餘，最重要有「精神力量」支持。主帥金正民爆料，話球隊上下，以至整個亞運代表團，都為國家領導人金正恩及同胞而戰，信念極之堅定，所以攻無不克，今仗鬥死敵，更加不容有失，必定傾盡所有力量爭勝。事實上，雙方近8次交鋒，北韓女足贏咗7次，完全食住對手，值得再追捧。

（有線61及201台周一晚7時直播）
為金正恩及同胞而戰

北韓女足8強淘汰爭標分子中國女足，保持全勝兼冇失波，主帥金正民分享成功之道，話球隊力量來自國家領導人金正恩嘅關懷：「好多人問我哋點解咁搏命爭取佳績，或者你會認為係為咗改善生活，但講真一句，我哋純粹為金正恩及同胞而戰，金正恩元帥經常對球隊噓寒問暖，關心我哋有冇傷病，食住情況，仲為球隊提供意見，令我哋獲益良多。」金正恩近期身體抱恙，或進一步刺激球隊贏波，望金正恩安心。

姑且勿論金正民是否擦鞋，北韓女足場上表現的確專注，又有紀律，體力充沛攻守兼備，上仗圍攻中國女足，贏得好有說服力。再睇埋北韓女足過去4屆亞運獲兩冠兩亞佳績，的確令人充滿信心。
近8次對賽7勝1和

至於南韓女足分組賽抽到好籤，對兩支大魚腩印度及馬爾代夫都贏雙位數入波，但8強對質素好些少嘅中華台北，即見真章。南韓該仗即使擁有効力車路士女足嘅前鋒池笑然歸隊，但進攻唔見銳利，僅小勝1比0。往績上，南韓女足更處於絕對劣勢，近8次對賽得1和7負，包括06年亞運慘敗1比4。南韓女足亦從未打入亞運決賽，遇上勁敵，更難破宿命。
靈感女神莎拉是日亞足金「據」

(一)1 越南女足 Vs 日本女足

日本女足今屆4戰入26球，當中3次贏波半場至少入2球。

(一)2 南韓女足 Vs 北韓女足

兩軍今屆為止所有比賽均沒有失球。