史篤城拆紐送柏杜一程

猪拉多纳

喜鵲順應民意 輸波即換帥

有時踢波唔係齋講實力，好似今晚英超獨腳戲史篤城主場對包尾嘅「喜鵲」紐卡素，後者領隊柏杜早已民心盡失，肥佬班主艾殊利見風頭火勢即「順應民意」，只要今仗一輸即炒柏帥，眾將又冇心為佢賣命，史篤城仲唔趁機送柏帥一程咩？史軍小讓平半梗係撐上盤喇。

（now 621周二凌晨3時直播）

正所謂冰凍三尺非一日之寒，紐卡素今季戰績曳並非柏杜犯眾憎嘅主因，上季佢忽然發神經用「鐵頭功」頂撞侯城球員大衞美拿，雖已被重罰停賽7場，但其無品行為丟盡球隊面，不過礙於柏杜有長約在身，一向縮骨嘅肥佬班主艾殊利唔敢郁佢。可惜，今季紐卡素開咧五戰未贏過排緊包尾，粉絲亦忍無可忍，上仗對侯城印咗15,000張「SACK PARDEW.com」海報要求炒柏帥，可謂群情洶湧。

另一單嘢係紐卡素得悉中場約拿斯古迪利斯患睾丸癌後，曾要求佢離隊搵新東家，當年「喜鵲」降班佢亦不離不棄，依家竟遭如此對待，粉絲更加怒不可遏，艾殊利見勢色唔對，即向柏杜發出最後通牒，只要今仗作客史篤城再輸即炒冇情講，此舉擺明係想轉移視線喇。
紐記後衞發夢狂失波

史篤城勝在四平八穩，領隊曉士將呢支「天空之城」注入唔少打地波嘅元素，而且新援馬美迪奧夫亦加強反擊速度，上周中英聯盃反勝新特蘭晉級，士氣大振，相反「喜鵲」好多球員都冇心為柏杜賣命，尤其係班後衞經常夢遊，近四仗狂失十一粒，加上陣中大衞辛頓、賴恩泰萊、施安迪莊、法古度費雷拉受傷，仲有阿比特坐波監，相信柏杜「眾望所歸、冇得留低」，史篤城小讓平半兼低水，上盤有買趁早。