傻豹做大騷啱素

猪拉多纳

法蘭高華斯基斯腳風順

雖然今晚兩場意甲戲碼麻麻，但唔代表冇好嘢推介，其中壓軸戰「傻豹」巴勒莫主場火併拉素，「傻豹」中場法蘭高華斯基斯腳風勁順，可惜防線甩漏多多，不過拉素中後場亦傷兵滿營，斯維認為入球大有逾兩倍分頭更值博。

（TVB 301周二凌晨3時直播）

今季重返意甲嘅巴勒莫表現唔差，尤其係中場法蘭高華斯基斯連續三仗有士哥，腳風順到冇朋友，箭頭比洛迪亦重拾射門鞋，上仗梅開二度逼和勁旅拿玻里，但升班後三和一負未開齋，全因後防漏洞百出，而守將艾斯基蒙路斯及基安卡路干沙利斯繼續養傷，勢必中門大開。
拉素防線穿窿

不過，拉素亦五十步笑百步，頭四仗聯賽輸咗三場，狀態超曳，今仗仲有真迪列堤、史堤芬拉度等守將因傷缺陣，又係法蘭高華斯基斯數胡好時機，雙方近三次碰頭均大手交易，大盤有2.19倍分頭咪錯過。