歐洲賽地頭惡慣 PSG「讓主」切塞

猪拉多纳

球迷呢排睇電視，有冇留意我哋宣傳嘅「巴塞突擊死亡塔」？巴塞作客聖日耳門呢場大戰，絕對係分組賽其中一場重頭戲，牌面上係就係巴塞高啲，不過PSG主場威力強大，佢哋對上一次喺歐洲賽主場輸波已經係差唔多8年前嘅事，巴塞今季踢法明顯變得保守穩陣，加上要顧忌卡雲尼等射手，睇怕唔會隨便攻，受讓嘅聖日耳門1.75倍「讓主」抵玩。

（有線62、202及中央5台周三凌晨2:45直播）

講起聖日耳門，球迷多數會提起伊巴謙莫域、卡雲尼、拿維斯同盧卡斯洛迪古斯等攻擊球員，但畢竟教練係法國世盃冠軍後防名將白蘭斯，所以穩健防守亦係呢班波極強嘅一環！上季佢哋捧走法甲冠軍，就多得全季只失23球嘅歐洲「冧巴溫」防線，失球數字同拜仁、祖記等四大聯賽冠軍隊同樣咁少，所以千祈咪當呢班波有前冇後！
前屆兩度交手皆和

正因為有條咁穩陣嘅防線，聖日耳門喺歐洲賽主場成績極佳，佢哋已經保持歐洲賽主場29戰不敗，對上一次輸波要追溯到接近8年前嘅06年11月！雖然日前有拿維斯受傷要抖3至6個星期，倒戈嘅伊巴謙莫域亦趕唔切喺今場復出，好在仲有卡雲尼、盧卡斯洛迪古斯等進攻好手壓陣，火力唔使擔心。睇番前屆歐聯淘汰賽，當時聖日耳門同如日中天嘅巴塞兩次交手都係打和，「地上最強」只靠作客入球優惠晉級，今場想贏唔係易事。
安歷基求穩未必搏

講開巴塞，佢哋喺分組賽首仗1:0小勝尼科西亞，唔少球迷都話贏得少唔收貨，但實情係新教練安歷基改緊隊波嘅踢法，一於穩陣行先，今季6戰零失球就係最佳例子。今場巴塞作客巴黎，都算係佢哋最難踢嘅一場分組賽，和波袋1分走相信安歷基都會收貨，要讓波梗係吼實聖日耳門「讓主」啦！
頂占筍盤：巴黎聖日耳門（讓主）