阿仙奴谷盡掃雷

猪拉多纳

背城借一殘陣照搏

歐聯分組賽今晚好戲連場，D組次輪重頭戲阿仙奴主場火併土超勁旅加拉塔沙雷。雖然阿仙奴傷兵名單水蛇春咁長，但由於首輪輸咗，今仗返主場實在不容再失，況且佢哋對土耳其球隊有一手，戰意十足下可擸三分，進取啲不妨直取讓球主勝。

（有線64及203周四凌晨2時45分直播）

阿仙奴傷兵多嘅問題今季未有大改善，除咗前鋒基奧特、耶耶辛洛高、翼鋒禾確特同右閘迪保治全部未好番，日前係聯賽幾經辛苦以1比1逼和和熱刺，隊長阿迪達、中場艾朗藍斯同韋舒亞都加入埋「十字兵」行列，前兩者今仗更肯定倦勤。只不過，兵工廠喺歐聯分組賽首戰作客多蒙特已淨吞雙蛋，今場若再失分，出線形勢就會好被動，就算緊接要喺倫敦打吡戰鬥車路士，睇怕領隊雲格都會贏埋今場至算。
加拉塔沙雷患恐英症

另一邊廂，今季加拉塔沙雷請到前意大利國家隊領隊柏蘭迪利執教，但佢唔好得前任文仙尼幾多，唔單止喺國內聯賽只排第四，於首場分組賽主場只係與安德列治各一言和，狀態認真麻麻，尤其係中前場，荷蘭中場史奈達亦不復當年勇，另一箭頭彭迪夫又冇料到，單靠布拉卡爾馬斯數胡，可謂獨力難支。而且加拉塔沙雷打歐洲賽不嬲靠「地獄主場」搵食，作客好多時都腳軟，例如佢哋以往造訪英格蘭球會，就得3和6負，完全患上英倫恐懼症。

近兩屆鬥土耳其兵未輸過

相反，阿仙奴近年喺歐聯對土耳其球隊甚有辦法，連續兩屆喺附加賽淘汰比錫達斯及費倫巴治，四仗合計三勝一和未輸過，擺明係格食格喇，主勝1.41倍乃穩陣之選，若嫌唔夠分頭可直取讓球主勝。