貧富大戰禾堡搵錢擲里爾

猪拉多纳

歐霸盃H組德甲禾夫斯堡主場對法甲里爾，係貧富懸殊之戰，有大眾汽車支持嘅禾堡，對今屆歐霸盃充滿野心，首仗落筆打三更慘敗於愛華頓後，今仗不容有失，返到主場喜遇窮鬼球隊里爾係時候發威，禾堡讓半一，Alwin撐上盤。

（有線18台周五凌晨1時直播）

歐洲足協今季行新制，歐霸盃冠軍可以直接攞到下屆歐聯入場券，令呢個盃吸引力大增，禾堡喺德甲雖然係實力分子，但面對拜仁慕尼黑、多蒙特、利華古遜、史浩克04同慕遜加柏等勁旅，歐聯席位競爭實在好激烈，由歐霸盃尋出路亦係一個好選擇，佢哋成班球員除咗克羅地亞老將奧歷（2005年為莫斯科中央陸軍贏得歐霸盃冠軍）外，全部都未贏過歐洲賽事錦標，所以會方早已定下目標，贊助商出到上季雙倍嘅獎金激勵士氣，全力爭取呢個盃賽冠軍。
首仗負愛華頓如發噩夢

禾堡喺H組首仗落筆打三更，作客畀愛華頓大炒4比1，但戰果未足以反映雙方實力同表現，場波雖然係愛華頓主場，但全場形勢都係禾堡佔優，全場射門達到27比12，只係當日確實唔係禾堡嘅日子，防線主力列卡度洛迪古斯開波冇耐就失運擺烏龍，跟住前線射極唔入，加上球證兩個錯誤判決，先送一個喺禁區外犯規嘅12碼畀愛華頓，然後又將米拿拉斯嘅越位入波判有效，禾堡咁樣慘敗等同發噩夢，球隊上下谷住道氣，今晚決心搵里爾發洩。
里爾為還債焗賣走主力

里爾陷於財困，66歲嘅會長塞多克斯決心將絕大部分資源用喺償還興建新球場嘅巨債，情況就好似早幾年嘅阿仙奴一樣，搞到球隊要節衣縮食，固然冇錢買新兵，仲要將主力球員賣走，包括將最有威脅嘅科特迪瓦箭頭沙洛文卡勞廉價賣畀哈化柏林，實力大幅削弱，佢哋目前雖然排喺法甲第三，但只係一味靠守，8場聯賽只入7球，攻力十分疲弱，而且只係一味靠主場攞分，作客表現差好多，佢哋喺歐霸盃首戰主場對俄羅斯卡斯洛達都贏唔到，今晚作客面對志在必得嘅禾夫斯堡相信凶多吉少。