卡斯洛達撻着大爆發

猪拉多纳

今晚阿King睇中咗H組俄超球隊卡斯洛達主場對英超球隊愛華頓嘅賽事。卡斯洛達近期取得三連勝狀態甚弗，球隊入球能力唔錯，主場面對今季防線表現大跌嘅「拖肥糖」愛華頓，相信入波唔會少，阿King捧入球大。

（有線61及201台周五凌晨零時直播）
愛華頓防線慌失失

俄超球隊卡斯洛達連贏三場而且攻入十球，平均每場有三球進帳，陣中有主力射手祖奧仙奴因為之前附加賽攞紅牌而要停賽，但球隊前線仍有近期成日有波入嘅射手阿里及杜卡莫在陣，相信主場出擊要攞到入球並非難事。

「拖肥糖」今季喺英超表現跌Watt，同球隊傷兵問題有好大關係，而且防線中路不穩，無論係菲臘積基爾卡夥拍迪斯甸或史東斯皆出現漏洞，縱使門將侯活繼續有出色表現，但「雙拳難敵四手」下難怪成為英超失球最多嘅球隊，今仗捧入球大。

其餘賽事方面，烏克蘭球隊米達列斯有巴西中堅艾馬費古拉重傷未能趕及披甲，而另一守將尤素夫亦飽受傷患困擾，球隊實力大為削弱；至於比利時球隊洛格倫傷疲盡起，今仗有望藉主場之利贏番場，平手盤值得支持。