「維城」宜齋睇過隔籬玩2串1

猪拉多纳

雖然今晚英超較強戲碼，當屬曼城作客阿士東維拉，但「藍月亮」經過上季勇奪聯賽冠軍之後，可能失去爭勝嘅飢渴感，今季表現得太過飄忽，忽然成為海鮮波，啱啱周中歐聯大好形勢遭羅馬逼和，可見一斑。縱然曼城主帥比歷連尼麾下，有阿古路、迪斯高、大衞施華、耶耶托尼、高柏尼等猛將，卻好多時候未能打出應有嘅水準，今仗對住「豬頭骨」阿士東維拉唔易啃，客W太乏味又唔穩陣，因此Peter認為呢場波只宜純粹欣賞算啦！
乘埋2.88倍好分頭

若果真係要揀一兩場值博嘅賽事，Peter會推介李斯特城主場對包尾大幡般尼，「李城」之前喺自己地頭爆冷反勝曼聯5比3，真係精彩到暈，今場主W有1.62倍乃不二之選。

至於「天鵝」史雲斯的確表現不俗，以蔗渣價錢踢出燒鵝嘅味道，英籍中場舒維爾更愈踢愈好，佢哋喺主場出戰尾二嘅紐卡素，「喜鵲」不但傷兵滿營，領隊柏杜不得民心臨近被炒邊緣，「天鵝」個主W亦有1.78倍，與「李城」主W組成過關二串一，乘埋有2.88倍分頭都唔錯，希望大家可以有斬獲。

金句：李城天鵝主場大過天，2×1炒埋夠一碟