曼城喪攻演入球騷

猪拉多纳

阿古路 迪斯高 着火o趙維拉

歐洲列強開始忙到踢晒腳，除咗本土聯賽同盃賽之外，仲要應付埋歐聯或者歐霸戰線，部分球隊更要一周三賽，做球迷齋睇梗係爽啦，但班球員就似乎到散晒喇！到目前為止，英超暫時冇一支球隊可以喺聯賽、盃賽同歐洲賽錄得3連勝，就連衞冕嘅曼城都唔例外。之不過咁，佢哋近排啲火力返晒嚟，齋計近3場已經喪入12球，今晚造訪阿士東維拉，預料射手如雲嘅「藍月亮」將射爆佢哋條豆腐防線，捧1.65倍大啱數。

今季力爭衞冕英超嘅曼城喺上場聯賽以4:2大破侯城，英聯盃又大炒錫周三7蛋，但喺歐聯就仲未打開勝利之門。佢哋周中歐聯分組賽主場被羅馬逼和，最激心係畀兩位前曼聯名將史高斯同里奧費迪南寸冇粉絲撐場，唔嬲就有鬼啦！
後備殺手林伯勁入波

不過今晚就係「藍月亮」出氣嘅好時機，阿古路同迪斯高近3仗合共轟入6球，加埋變身「後備殺手」嘅林柏特寶刀未老猛咁入波，最重要係拿斯尼「替工」占士米拿擔番正之後勁搏命，兩邊出波甚至遠射都交足貨，維拉防線今晚肯定大鑊。
維拉守將華亞爾上陣成疑

Yennie睇死維拉唔係冇道理，呢支中部球隊開季也文也武，皆因佢哋未受到真正考驗，但最近兩仗對住阿仙奴同車路士兩支勁旅即刻現形，兩場波分別吞3蛋。後防定海神針華亞爾又話小腿有傷未能落場，即使比利時射手賓迪基有望傷愈復出，睇怕都係入埋唔夠後面輸，小妹一於剝定花生，今晚印印腳睇實曼城點樣數爆維拉。
盤路解碼

曼城近20場聯賽作客開出「-1」盤口，成績為9勝3和8負。
曼城作客例入2球

以2.5球中位數計，雙方近10次對壘開出7大3細。

兩軍近3季英超交鋒，曼城取得5勝1負。

「藍月亮」近6場英超作客賽事，每場最少攻入2球。
藍月亮旺開雙再追

維拉同曼城近年對碰不乏入球騷，入球大固然捧得過。翻睇「藍月亮」近15場英超作客賽事，其中開出4單11雙，入球雙比率超過7成，信績嘅朋友今場不妨諗諗個1.8倍「雙」吖。