曼聯陣容結構極唔勻稱

猪拉多纳

今晚英超有兩場矚目大戰，早場係曼聯對愛華頓，同埋緊接嘅車路士對阿仙奴。首先講曼聯，自尹戈爾接手後戰績差強人意，亦令Peter感到奇怪，身為一名大師級教頭，竟然忘記咗隊制運動，講求分工合作及令眾將之間產生化學作用，不過佢所簽嘅大部分都係進攻型球員，卻忽視咗陣中防守嘅問題，如右閘拉菲爾達施華近年進步緩慢，而左閘新兵勞基梳爾雖年輕有速度，但其作用與另一新援馬高斯盧祖，甚至同經常於左路搵食嘅迪馬利亞重疊，而成堆前鋒尹佩斯、法卡奧、朗尼個個獨當一面，卻欠缺一些以無球跑動為隊友製造空位嘅綠葉，或者一名防線前屏障嘅防中，如此唔勻稱嘅陣容結構，導致成績欠佳。
槍手中後場唔夠卡士

至於倫敦打吡車路士主場對阿仙奴，前者自「寸王」莫連奴今夏執正隊波後，喺聯賽只曾被曼城逼和失咗兩分，儘管阿仙奴新兵如阿歷斯山齊士都有料到，但班後衞及防中未達頂級，搞到經常前面入埋都唔夠後面輸，因此今仗作客史丹福橋球場兇險重重，Peter覺得佢哋極其量只係和波，要贏車仔就好難嘞！
金句：紅魔大師忘記了，分工合作化學作用的奧妙