米爾頓盃賽醒神攞硬A

猪拉多纳

今晚英格蘭聯賽錦標打晒骰，喺咁多場第2圈賽事當中，卡爾萬睇中米爾頓凱恩斯主場鬥AFC溫布頓。米爾頓凱恩斯每逢踢盃賽特別醒神唔在講，兩名箭頭阿科比同基歷治又着晒火，要繼英聯盃之後再贏AFC溫布頓，可以話冇難度，揀2.25倍「讓球主勝」啱數。

（開賽時間：周三凌晨2:45）
英聯盃 曾炒AFC溫布頓

米爾頓凱恩斯喺英甲欺善怕惡，今季3場輸波對手全屬前列分子，今場對住乙組仔AFC溫布頓，唔使問實搶錢咁搶。而且佢哋今季喺盃賽例牌搏到盡，除咗英聯盃贏過今仗對手AFC溫布頓3:1，最經典莫過於越級挑戰成功，埋單4球怒炒曼聯。如今再遇手下敗將，要贏多次易過借火啦。

再者，由阿仙奴借將阿科比同北愛爾蘭國腳基歷治組成嘅米爾頓鋒線無堅不摧，佢哋近4場輪住入波冇斷過纜，夾埋貢獻咗6球，其中年僅21歲嘅英格蘭新星阿科比，更係每次踢盃賽都有波入，3場斬獲5球，火力咁猛，睇怕已經連續4場作客未贏過、兼夾場場有失波嘅AFC溫布頓，今晚都要再做炮灰咯！

英格蘭聯賽錦標賽制：今輪為第2圈賽事，如法定時間內打和，即互射12碼決勝。