意大利群鋒爭位點肯收疆?

猪拉多纳

H組意大利坐鎮主場迎戰弱旅阿塞拜疆。「藍衣兵團」鐵帥干地藉棄用巴洛迪利整頓軍紀，反而造就另一位喺英超搵食嘅「高齡新丁」加斯安奴柏利表演機會，而迪斯度、恩莫比尼等箭頭亦對當家中鋒之位虎視眈眈，無論干地派邊個出場都必定搏甩髀爭士哥，阿塞拜疆聽做炮灰，斯維力撐讓球主勝。

（有線63台周六凌晨2時45分直播）
加斯安奴柏利初登場

意大利自前祖記鐵帥干地接手後，已連續兩次國際賽期冇召射手巴洛迪利，雖然佢解釋因巴神重返英超需要時間適應，但明眼人都睇得出係因為巴神紀律欠佳，干地將佢棄用以重整軍紀，況且佢手頭上確實有其他優秀前鋒可用。如首度入選嘅加斯安奴柏利，今季登陸英超即有貨交，已轟入4粒助修咸頓暫列第3，比聯賽未開齋嘅巴神弗好多。

其實加斯安奴柏利過去兩季為飛燕諾轟入50粒，只因荷甲未受關注而令佢被忽視，唔好睇呢位高大中鋒淨得頭槌一瓣，佢嘅腳法其實亦唔錯，以29歲高齡初次入選可謂大器晚成，甚有06年世盃奪冠功臣東尼嘅影子。
阿塞拜疆近況曳爆

事實上，依家意大利鋒線群龍無首，唔單止「高齡新丁」加斯安奴柏利，其他前鋒如迪斯度、恩莫比尼及施蒙尼沙薩，都想藉巴神「守行為」期間爭取表現搶當家中鋒之位，干地亦樂於見到呢種良性競爭，難得今仗喺主場出戰弱到冇朋友、近4仗輸3場嘅阿塞拜疆，邊個披甲都會搏老命爭入波，加上老大哥派路傷愈獲重召，有佢喺中場派牌令意軍進攻組織更加流暢，勢必大炒阿塞拜疆，讓球主勝非常值博。