威爾斯波斯尼亞有前冇後玩大佢！

猪拉多纳

巴利 Vs 迪斯高火力全開

歐國盃外圍賽今晚激戰連場，想睇星嘅話，加里夫巴利火併迪斯高呢個Match Up冇得頂喇啩！威爾斯今晚喺加的夫恭候波斯尼亞，主隊由一班二打六鎮守後防，客軍就有3大守將缺陣，既然大家都係有前冇後，呢場B組賽事當然要捧2倍入球大。

（有線64及203周六凌晨2:45直播）

今戰喺卡迪夫城球場舉行，威爾斯足總預期起碼有2.5萬名球迷入場，咁樂觀又唔係冇道理嘅，畢竟國家隊上輪外圍賽砌低安道爾之後，世界排名勁升12位，家陣同蘇格蘭並列第29位，係近20年以嚟嘅最高排名，國民自不然對國家隊充滿憧憬。
威爾斯二打六防線難保清白

出爐威爾斯足球先生加里夫巴利今晚會孭重飛，夥拍卓治合組雙箭頭，火力絕對唔使懷疑，但考慮到威爾斯門將軒尼斯，以及幾位守將基斯根達、占士謝斯達同尼爾泰萊都只係二打六貨色，近5場國際賽亦場場有失波，證明條防線真係唔多掂，點頂得住迪斯高、伊比斯域同比真歷呢個波斯尼亞鐵三角嘅進襲先？
波斯尼亞守將缺陣

波斯尼亞上輪主場不敵塞浦路斯，領隊蘇錫已經聞到魷魚香，今鋪就算作客都肯定要搶攻求3分，斷估唔會踢得保守。弊在史浩克左閘哥拉辛拿斯、賀芬咸中堅畢卡錫都受傷缺陣，就連啱啱出山救國嘅利華古遜老大哥史柏希斯，都話有傷在身未必落場，後防穿晒大窿，正式係有前冇後，今鋪對住威爾斯隨時大手交易。
歐國盃B組：盤路解碼

波斯尼亞連開3口入球大。
Data King：威爾斯近5戰場場失波

‧威爾斯近8仗未試過半場領先。

‧威爾斯近5戰場場失波。

‧雙方近兩次交手，波斯尼亞錄得1勝1和。