西班牙換鋒 有堡證

猪拉多纳

迪保斯基唔想攬炒棄「迪哥」

今晚歐國盃外圍賽C組，衞冕嘅西班牙再度作客出戰魚腩盧森堡，「鬥牛國」日前意外輸波，仲未開齋嘅箭頭迪亞高哥斯達成眾矢之的，領隊迪保斯基一向老謀深算，今仗勢必棄車保帥，改用弗爆新仔柏高艾卡沙，無謂與「迪哥」攬炒，並將一腔怒火發洩喺盧森堡身上，就算要讓3球都照撐讓球客勝。

(有線61及201台周一凌晨2時45分直播)
柏高艾卡沙更啱用

日前西班牙作客1比2不敵斯洛伐克，近8年來首次喺大賽外圍賽輸波，主帥迪保斯基一心將喺車仔踢到風生水起嘅進攻孖寶迪亞高哥斯達同法比加斯，移植到「鬥牛國」，雖然「迪哥」表現落力，但佢極速融入英超嘅衝撞型打法，喺國家隊卻與中場大衞施華、恩尼斯達等打開嘅Tiki Taka，明顯格格不入，畢竟佢擅踢簡單直接嘅快速反擊，可惜班隊友掛住搓搓搓，想快都快唔到，難怪踢咗6場仲食緊白果啦！

以往迪保斯基採用無鋒陣雖為人詬病，卻連奪世盃及歐國盃，因為之前無論用韋拿定費蘭度托利斯都係周圍走嘅前鋒，藉此拉散對方防線為隊友後上製造空位，與習慣於禁區肉搏嘅「迪哥」完全唔同，迪帥刻意轉型，希望多一道板斧，點知自己攞嚟衰。再舉個反例，上月熱身賽西班牙不敵法國踢到堅曳兼傷埋「迪哥」，但4日後對馬其頓用咗新仔柏高艾卡沙卻大勝五個一皮，因為呢位華倫西亞前鋒走位飄忽速度快，其他中前場球員即刻生晒，上仗佢後備入替建功一度扳平，連續兩場有士哥弗到震，「迪哥」可謂相形見絀。
搵盧森堡做出氣袋

另一邊廂，盧森堡一向係魚腩部隊，陣中只得迪韋尼賀達、基斯菲臘斯、拿斯高治等少數外流球員，今年除咗試過打和熱身賽例揸流攤嘅意大利外，其他賽事都係輸多和少，上仗作客馬其頓一度反先下最終臨尾香輸埋，嚴重打擊士氣。

迪保斯基不嬲老謀深算，經過之前嘅教訓及為保出線機會，唔會再固執死攬「迪哥」，而會揀當頭起嘅柏高艾卡沙，相信西班牙會當盧森堡係出氣袋大勝一場挽回面子，讓球主客和要讓到3球，斯維都力撐讓球客勝。