中村憲剛回歸 川崎齊「腳」抵撐

猪拉多纳

日聯盃準決賽今日爆發次回合生死戰，首回合落後1:3嘅川崎前鋒，主場至少要贏大阪飛腳2:0先可以逃出生天，5年嚟第一次打入盃賽決賽，咁嘅環境平手盤肯定係博1.91倍嘅川崎。

（開賽時間：周日下午3:00）

由今季日職排名去睇，川崎、飛腳可以話係五五波，首回合川崎輸得咁慘，絕對同陣容不整有關，佢哋唔只有前鋒小林悠入選日本國家隊，得番件大久保嘉人响前面搵食，中場大腦中村憲剛亦因為左腳有事唔踢得，搞到後衞小宮山尊信要推前打右中場，有乜辦法唔死吖！
川崎主場勝率高

今日中村憲剛應該出得嘞，川崎嘅中場組織力相信會回復舊觀，而且佢哋今季排到聯賽第4位，完全係靠高達57個巴仙嘅主勝率，呢兩樣嘢加埋，川崎贏番飛腳一場唔會係夢想，何況川崎班人並冇受上場輸波影响信心，中場森谷賢太郎、大島僚太幾個都話有信心同決心反勝，呢場波飛腳一定有排受。
飛腳作客失波多

當然，飛腳呢支傳統勁旅唔係紙紮嘅，鋒將宇佐美貴史相當Fit吓，首回合都有波入，最重要係响日聯盃6次對賽入面，飛腳以4勝1和1負佔上風，其中兩次作客等等力球場更加未輸過，川崎完全畀佢哋食住，不過飛腳有個毛病係作客失波偏多，聯賽14場客戰失咗18球，絕對係中游球隊水準，喺呢場生死戰畀川崎贏番鋪真係唔奇，平手盤揀主隊最保險。