荷雙箭化敵為友大舉破冰

猪拉多纳

幾經辛苦，希丁克終於取得重掌荷蘭帥位後嘅首場勝仗，反勝哈薩克3比1，雖然過程驚險，但總算令越嚟越大壓力嘅球員同教練團鬆一口氣，重拾信心，振奮士氣。荷蘭喺周二凌晨會喺歐國盃外圍賽A組作客近況大勇嘅冰島，入球大捧得過！

（有線61及201台周二凌晨2時45分直播）

睇返A組形勢，荷蘭排緊第3位，冰島兩戰全勝與捷克同得6分，中場大將基菲爾施古臣狀態大勇，連續兩場都有波入，講近況，冰島真係唔驚荷蘭。

荷蘭上場贏得狼狽更爆出內訌，亨特拉爾不滿尹佩斯獨食，向後者怒吼，「尹佬」賽後亦作出反擊，兩大射手傳出不和，雖然會影響軍心，但同時亦證明咗二人心入面有團火，都想為球隊入波，只要佢兩個專心一意踢波，將私人恩怨擺埋一邊，要入波？唔難囉！其實主帥希丁克上場換入亨特拉爾後，効果立竿見影，今場有可能繼續派佢拍住「尹佬」打雙箭頭，再加上重生嘅進攻中場阿費利，攻力有保證！
捷克炒得起哈薩克

同組另一場哈薩克主場鬥捷克，哈薩克上場對荷蘭先勝後敗，仲有前鋒迪祖尼切夫被逐今仗停賽，捷克技高一籌，捧讓球客勝。

（有線61及64台周二凌晨零時直播）