葡萄牙細不低頭

猪拉多纳

作客丹麥C朗膝傷頂硬上

葡萄「冇牙」咬唔入丹麥！今季大勇嘅基斯坦奴朗拿度似乎同國家隊八字唔夾，為國出征即受傷，佢將於今晚歐國盃外圍賽I組，紮住頂硬上作客鬥丹麥，發揮勢必大受影響。加上葡軍新帥費蘭度山度士戰術保守，預料會排「無鋒陣」，想入波就更難。至於丹麥仲要靠「中堅賓」食胡，恐怕只會食白果，雙方皆缺乏破門本錢，最好揀入球細。

（有線64及203台周三凌晨2時45分直播）

葡萄牙首輪分組賽冇C朗情況下，0比1不敵阿爾巴尼亞，依家終於等到佢擺脫傷患，重返國家隊，而且喺皇馬瘋狂入波，腳風極順。點知日前熱身賽對法國又整傷左膝舊患，注定佢喺國際賽冇運行。事實上，即使C朗大勇期間，佢喺國家隊嘅演出亦唔及踢皇馬，皆因兩隊戰術及隊友都唔同，更何況呢位巨星有傷在身，更難以獨力支撐起球隊。好可能重演佢喺今屆世界盃踢到冇晒癮嘅情況。

另外，葡萄牙聘請費蘭度山度士執教亦不利C朗發揮，皆因費帥傾向防守戰術，佢過去四年執教希臘國家隊，大踢悶蛋足球。上仗熱身賽排出「無鋒陣」，由C朗同拿尼擔任「假9號」，C朗有傷，拿尼把握力差，唯一後備前鋒艾達十三次為國上陣都冇波入，呢條鋒線真係睇見都唔開胃。
丹麥4分在手先求不失

丹麥亦唔好得去邊，今時今日正選前鋒仲係賓特拿，「中堅賓」兩場外圍賽都踢足全場，但冇建樹。丹麥上仗對阿爾巴尼亞，最終靠後備上陣嘅拉斯維比臨完場前入波，先至逼和對手1比1，今仗面對大名鼎鼎嘅C朗，估計丹麥都唔敢壓得太前。況且丹麥已有四分在手，唔輸畀爭出線勁敵葡萄牙已經達標，冇必要同對方鬥攻。