巴西爭勝食住個細

猪拉多纳

劏完阿根廷 赴星洲鬥日本

巴西世盃結束後，球壇出現一陣換帥潮，世盃亞軍阿根廷由前巴塞隆拿教頭馬天奴頂替沙貝拉執教，意大利改由干地領軍，荷蘭就「翻撻」希丁克，至於世盃主辦國巴西亦有鄧加再執教鞭，領軍3場全勝之餘更一球不失，今晚「森巴兵團」將喺新加坡對住同樣換上新帥嘅日本，鄧加將會繼續採取防守踢法，細盤值得捧場。

（TVB 301周二晚6時45分直播）

今夏世盃球迷見證住「森巴足球」已死，踢法不再華麗，亦不再崇尚進攻，當知道主張防守、快速反擊嘅史高拉利下台後，「森巴粉絲」只係開心咗一陣，因為佢哋見到巴西足總搵嚟戰術更保守、強調紀律嘅鄧加返嚟領軍，即係話，「森巴足球」難再重現，「森巴粉絲」或者都要接受呢個事實。
香川缺陣攻力大減

球員時代踢防守中場嘅鄧加認為進攻可以贏得掌聲，防守卻可取得勝利，佢重掌帥印後嘅3場波都係靠防守致勝，3場都係小勝，即使上場在北京面對死敵阿根廷，都係以守為主，踢得被動，進攻亦欠缺板斧，即使有尼馬、奧斯卡杜斯山度士同韋利安等進攻球員在陣，只得零星攻勢，相信今場對日本難以取得大勝。

日本喺七月任命墨西哥籍教頭艾古爾為新帥，上場對牙買加終於打開勝利之門，雖然呢位主帥崇尚進攻足球，但今場面對防守力強嘅巴西恐怕係有心無力，進攻主力香川真司上場又撞親個腦，今場肯定缺陣，靠晒另一大將本田圭佑發動進攻，可謂獨力難支，捧細更啱數。