巴西 日本 怕傷細Hea踢

猪拉多纳

日本波師承巴西，「藍武士」今日响新加坡國家體育場挑戰「森巴兵團」，理論上屬於班門弄斧，絕對係找死，但係星洲個球場草皮狀況好差，日本、巴西兩邊啲球星都可能要就住踢，呢啲友誼波玩吓個2.02倍入球細算喇！

（TVB網絡電視301周二晚6:45直播）

日本足球由職業化起步，就話到明响技術上以巴西為師，即使家陣國家隊換咗個墨西哥教頭艾古爾，打法依然係南美風格，仲要係崇尚進攻嗰隻。其實大前日已經到咗獅城嘅「藍武士」，操完一課之後已經宣布會踢4-3-3陣式，換言之係同巴西對攻，門將川島永嗣仲話「足球唔係經常只限由強隊勝出」嘅添，認真鬥志可嘉，按理大家都敢進攻，入球大先係投X正途。
草皮凹凸不平 足總認唔掂

但係大家唔好忽略一樣嘢——場地質素。新加坡足總上星期六派人視察國家體育場塊草皮，發覺嗰笪使咗50萬歐元（約480萬港元）嘅人造加天然草嘅混合草地，由於天然草生得唔夠好，仲未覆蓋到成個場，變咗好多地方係一忽忽沙地，凹凸不平，好容易整傷球員，足總事後發表嘅文告咁講：「我哋認為球場適合辦比賽，不過場波可唔可以如期舉行，要睇參賽隊同監場到時同唔同意。我哋亦必須承認，草皮情況達唔到國際賽標準，好可能影響（巴西同日本）球員嘅表現。」事實巴西尋晚試完場之後，主帥鄧加、尼馬都話唔掂！
星洲傳媒擔心球星唔肯落場

呢個使咗10億坡紙興建，有活動天頂嘅5.5萬人球場咁流，你話日本、巴西班人敢唔敢去盡先？《聯合早報》直情懷疑尼馬、卡卡、本田圭佑呢啲球星，會唔會冒險落場添。查實傳媒咁諗係有根有據嘅，兩個月前意甲班霸祖雲達斯訪問新加坡，同新加坡選拔隊踢咗場波大炒5:0，當時泰維斯、維達爾都冇亮相，祖記主帥阿里基就好唔客氣咁話：「個場太差，唔想佢兩個冒險咁無謂。」

打埋呢場太公友誼波就要各自返聯賽搏殺，你話班球星點會唔Hea吖，除非學香川真司咁撞親個腦啦，玩入球細算喇。