撐飛腳1.94倍「讓主」捉松鼠

猪拉多纳

今日場天皇盃大阪飛腳對大宮松鼠，根本唔需要計乜嘢數，直取1.94倍「讓球主勝」就得嘞，事關飛腳愈戰愈勇，開始呈現昔日嘅霸氣嘞。

（開賽時間：周三晚6:00）

飛腳呢兩年降過落日乙，今季打番上日職，初期表現都只係麻麻，但係踢踢吓就愈谷愈勁，近8場波入面只係上場响日聯盃4強次回合輸畀川崎前鋒，不過嗰場波佢哋唔淨輸2球或以上，已經夠數打入決賽，僅輸2:3就足以反映佢哋早就收夠籌。事實上，佢哋喺呢8場波入咗21球，宇佐美貴史、阿部浩之兩件土炮前鋒腳風不知幾順，主勝率高達62個巴仙，真係冇乜邊隊頂得住佢哋。
松鼠「打少3個」作客飛腳8成輸波

表面睇，飛腳3日前至同川崎硬碰咗一場，體能可能唔及松鼠，但係唔好忘記一點，松鼠雖然養精蓄銳，不過傷兵亦多過對方，後衞渡部大輔、菊地光將、前鋒美迪查3個都唔掂，相反飛腳係得U21小國腳西野貴治一件守衞養傷。松鼠人腳本來唔夠對手咁好質素，家陣仲要打少3件，作客有乜條件偷雞先？

至關鍵嘅係，松鼠家陣降班威脅好大，同尾三清水心跳同分，比尾二大阪櫻花只多2分，聯賽護級始終先係首要任務，何況佢哋以前10次作客飛腳，衰到得2勝8負，即係輸咗8成，今場冇理由唔博飛腳炒起佢哋啫。

日本天皇盃賽制：今輪為日本天皇盃8強賽事，比賽一場分勝負，若90分鐘內打和，則加時再戰，再和互射12碼定輸贏。