提早入季後賽戰意旺盛 新英倫平手起革命

猪拉多纳

新英倫革命喺季尾表現出色，上周已經篤定殺入季後賽，今輪佢哋作客侯斯頓戴拿模，為咗Keep住強勁士氣預計唔會Hea踢。相反對手侯斯頓戴拿模已經肯定無緣季後賽，防守唔掂係佢哋自2000年後首次無法打入季後賽嘅致命傷，相信今場主場出戰都係一樣，平手盤情願捧新英倫革命！

（開賽時間：周五早上8:00）
戴拿模後防曳 例行公事戰意成疑

新英倫革命今季表現好反覆，季中仲試過6連敗。好在佢哋喺8月中開始，扭轉之前嘅頹勢，過去10場波造出7勝2和1負嘅標青戰績。上場作客同蒙特利爾衝擊2:2握手言和之後，革命提早兩輪攞到進身季後賽資格。雖然提早入季後賽令到今仗變得意義不大，但革命為咗季後賽可以有一番作為，今戰相信唔會放慢手腳，務求K.O.戴拿模延續強勢。

相反，主隊侯斯頓戴拿模今季表現唔多掂，季後賽唔使預佢哋，呢支季後賽常客今季搞成咁，最主要係前線火力欠奉，後防又漏洞甚多，喺今季美職已經失咗54球，佢哋今仗仲有射手韋爾布恩同門將泰利賀爾因傷缺陣，對住當旺嘅革命就算主場3分都係凍過水。