阿德萊德聯勝利進攻「大」鬥法

猪拉多纳

今日下晝澳職有場獨腳戲，由2支同樣喺首戰旗開得勝嘅球隊對壘，阿德萊德聯主場鬥墨爾本勝利。兩軍踢法崇尚進攻，今季又分別擸到把新架生喺手，火力夠晒猛，與其估輸贏不如直取1.62倍入球大。

（有線64及203周五下午4:40直播）

阿德萊德聯今季陣容未有太大變化，雖然射手摩拉利斯紐曼離隊，但新加盟嘅前鋒柏保路山齊士來頭都唔細，曾經効力過維爾瓦、拉斯彭馬斯等西乙球隊，要適應甘帥提倡嘅西班牙式控球在腳踢法話都冇咁易。有呢位經驗豐富嘅前鋒坐鎮，呢支上季澳職常規賽入球王火力肯定更加猛。

另邊廂墨爾本勝利亦搵到把尖刀傍身，上季球隊首席前鋒杜羅奧斯走人後，球隊即刻補入前澳職神射手貝利沙。呢位前鋒仲喺上仗主場對西悉尼流浪者嗰陣，同另一主力前鋒艾奇湯臣齊齊開齋，協助球隊大炒對手4:1，火力認真得人驚。翻查紀錄，兩軍對上6次交手開出5口入球大，今次雙方再多件架生揸手仲唔開大片咩？