冇睇美斯？咁你走寶啦！

猪拉多纳

足球比賽無論係冠軍戰定熱身賽，戰情激烈嗰陣，會令人睇到如癡如醉，好似前幾日喺大球場舉行嘅香港足總百周年紀念賽，邀請到應屆世盃亞軍阿根廷國家隊出戰香港隊，前者上半場以雷霆萬鈞之勢領先3粒，易邊後換入隊長美斯後更加犀飛利，呢位Peter尊敬嘅球王唔單止梅開二度再加一個助攻，技驚四座，遙遙領先下佢仍帶波狂爆40碼，絕不欺場，末段有個球迷突破保安衝入場內，引來一陣混亂，但美斯表現非常冷靜，仲幫佢喺波衫上簽名，好波又有品，盡顯球王風範。冇入場睇波嘅球迷，今次真係走寶喇，因為冇本着Peter嘅格言──波要常常睇，咁先至可以睇到好波。
「喜鵲」牌面贏「狐狸」

講番今輪英超，Peter則睇中「喜鵲」紐卡素，呢支長期冇乜佳績嘅東北部名牌球隊，狀態明顯漸入佳境，今晚喺主場迎戰新升班嘅「狐狸」李斯特城，後者雖有丹麥一代鋼門舒米高囝囝卡斯柏舒米高鎮守大門，但「喜鵲」實力較高，值得秤先。