曼城餓虎出柙 誓擒熱刺

猪拉多纳

前幾日阿根廷對香港隊嘅比賽相當精彩！有球星睇不特止，仲有7個「士哥」咁多，大飽眼福！小妹近距離親眼睇到美斯、希古恩同迪馬利亞踢波，真係好滾動呀！但美中不足嘅係睇唔到曼城前鋒阿古路嘅球技啦！舊年阿古路跟曼城訪港，又係因為受傷兩場比賽都係齋坐，計埋上場波，佢已經喺大球場坐足270分鐘啦！冇得親眼睇佢落場，惟有坐定定喺電視機前面睇曼城喺主場鬥熱刺嘅直播啦！「藍月亮」質高又夠弗，要大勝冇難度，捧曼城2.08倍「讓主」！

（now621台周六晚7:45直播）

英超戰線今晚重燃戰火，呢個歐洲最頂級聯賽家陣嚟到第7輪，各路大軍究竟係咩料子，相信大家都應該一清二楚喇。車路士係唯一一支7戰不敗嘅球隊，暫居榜首，同排第2位嘅曼城相差5分，但領隊比歷連尼就話驚都未驚過，皆因「藍月亮」上季同階段落後緊阿仙奴6分，最後咪又係成功封王！比帥仲話上季曼城頭3場作客波冇贏過，但今季曼城喺頭3場作客比賽就拎咗7分，所以今季嘅表現更勝上季喎！
當弗阿古路 香港齋坐勁餓波

事實上，睇番佢哋近4場比賽贏咗3場，夾埋入咗14球，就知呢班波嘅火力係有幾猛啦！咁又唔奇喎，事關「藍月亮」前鋒阿古路、迪斯高、中場耶耶托尼、林柏特個個都弗到漏，輪住爆發入波，尤其係阿古路，自從佢登陸英超之後，入球數字每季都有番咁上下，絕對係名副其實嘅入球機器！

咪忘記早幾日阿古路嚟香港，淨係齋坐喺後備席，睇住美斯同希古恩上演入球騷，肯定好腳痕之餘，休息又相當充足，阿古路今晚「猛虎出柙」，仲唔搏命射爆熱刺騷哥利咩！

另邊廂，熱刺今季成績認真麻麻，佢哋除咗應付聯賽之餘，仲要兼顧埋歐霸賽事，弊在班球員又冇態，前鋒艾迪巴約到依家只係入得1粒，點信得過先？睇埋對賽往績，曼城近2次都淨勝熱刺4球或以上，夠開「讓球主勝」有凸啦！
Data King：迪斯高鬥熱刺多波入

‧曼城箭頭迪斯高近6次鬥熱刺取得6球進帳。

‧兩軍近7次英超交鋒，曼城取得6勝1負佳績。

‧雙方近6次英超對碰，聯手炮製30個入球，其中曼城貢獻22球。