利物浦起Q搶半W

猪拉多纳

默契好咗係時候發威

「呢個世界，冇話冇咗邊個唔得嘅！」不過，對利物浦嚟講，原來冇咗蘇亞雷斯，堅係唔掂囉！自「咬人蘇」轉投巴塞後，今季「紅軍」堅跌Watt，7戰只得10分，火力大不如前！好彩，班新兵經過季初磨合，默契已經好番好多，「疲兵」史達寧亦愈嚟愈成熟，今晚佢哋只係作客榜尾嘅昆士柏流浪，要換邊前鎖定勝局應該冇難度，一於捧1.95倍半場客勝啦！

今季由利物浦轉投巴塞嘅前鋒蘇亞雷斯，上季為紅軍披甲33次，拎到31個「士哥」，帶領利物浦以2分之差僅輸曼城，拎到個英超亞軍，利物浦亦得以時隔5年後，喺今季重返歐聯戰場！可惜，新季「SAS」進攻組合拆夥，「紅軍」已經冇晒鋒力同霸氣，今季新加盟嘅巴洛迪利、拉爾拉拿同列基林拔又未夾熟，講到底，利記一時間咁多新兵，又真係要啲時間去重整嘅，唔能夠太苛刻要求佢哋即刻做到嘢。
昆士柏7戰得4分 夏利叔被炒大熱

事實上，睇番「紅軍」上仗喺主場以2:1小勝西布朗場波，已經見到佢哋慢慢培養出默契，取得近5戰首勝，點都會提升番班球員嘅信心同士氣嘅！係，雖然史杜列治練波又整親抖多3星期，不過另一件英格蘭國腳史達寧已經蓄勢待發，上周中佢話自己好攰唔想幫太公出力，但出到場咪又係鬼打咁精神，間接幫朗尼射入奠勝球！最重要一點係，睇番利物浦今季3場英超勝仗，原來係採取「快刀斬亂麻」策略，3場波喺換邊前已取得領先優勢，如果信利物浦開到W，直接揀「半客」就仲實際！

另邊廂嘅昆士柏流浪，係今季英超表現最差嘅球隊，7戰過後只入5球拎得4分，但失球就有成15球咁多！鬼咩，領隊夏利列納成日掛住掠水，「御用中場」卡蘭積卡根本未夠班，無啦啦又嚟埋QPR，堅令人懷疑囉！難怪夏利叔係下位被炒英超領隊嘅大熱人選啦！
盤路解碼：「紅軍」近22場英超作客賽事開出19大3細，入球大比率高達86%！