山神交手「撞鬼」5連敗

猪拉多纳

綠雉開萬「勝」P抵捧

唔經唔覺又一年喇，日乙只剩低6輪賽事，排第6嘅岡山綠雉今日主場對第8嘅山形山神，係一場爭入升班附加賽嘅大戰，岡山仲趁機會搞個萬聖節P搵銀，咁今場波邊隊會見鬼呢？似乎係山形嘅可能性比較大，平手盤一於博岡山2.04倍「讓球勝」！

（開賽時間：周日中午12:00）

家陣日乙除咗湘南比馬升梗班，松本山雅亦好大機會亞軍衝線，剩低第3名磐田山葉到第10名札幌岡薩多，其實理論上都有權爭附加賽席位，今日就有兩場playoff資格關鍵戰，其中千葉主場對大分，主隊勝望高唱入雲，岡山對山形就勢均力敵嘞，所以今場波好受岡山Fans關注，球會亦借勢搞到萬聖節派對，推出特別版頸巾、水杯以至美食，「打劫」擁躉荷包。
出特別版精品美食搲銀

坦白講，從近況去睇岡山令人好唔開胃，近8場聯賽7場失分，3場主場全部和晒，仲要連出幾件傷兵。好彩除咗石原崇兆呢件中場緊要啲，染矢一樹、寄特直人都有人可以頂替，陣容唔算好殘，只要班人有番啲鬥心，主場反彈唔奇。

相反山形近期表現好啲，起碼8場波贏咗4場，不過大家留意睇吓，就知佢哋聯賽連盃賽已經4場客戰不勝，兼且後防線助攻力最強嘅石川龍也同埋小林亮都傷晒，仲要以往5戰岡山全部輸清光，今日作客其實有啲牙煙，既然係咁，都係要番平手盤嘅岡山合理啲。