國米拿玻里和波格

猪拉多纳

教頭保飯碗 箭頭爭士哥

國際米蘭同拿玻里今夜會師聖西路上演意甲第7周賽事，4位仁兄好苦惱，馬沙利、賓尼迪斯為保飯碗，倒戈非勝不可；莫路伊卡迪同希古恩就要力爭士哥，冀望衝出近期喺聯賽嘅低潮。

（TVB301周一凌晨2:45直播）

馬沙利喺2009至13年帶過拿玻里，跟住教國米，季初係威係勢，頭4場聯賽2勝2和，當中更大炒薩斯索羅7蛋，點知突然跌Watt，1:4慘負卡利亞里、再吞費倫天拿3蛋，馬沙利當然受壓，今場再有差池，印尼班主托希爾隨時送上無情雞，國米有前鋒奧斯華度喺國際賽整親，後衞迪岩布斯奧喺操練時受傷，雙雙倦勤。

賓尼迪斯2010年教國米一季贏埋世冠盃，舊年轉教拿玻里戰績唔錯，不過今季一開始就喺歐聯附加賽出局，聯賽亦意外輸畀基爾禾同烏甸尼斯，管理層同球迷梗係不滿，好彩近期表現好番，計埋歐霸盃錄得3連勝，今場面對頹勢嘅國米如果失分，就會被前列球隊甩開。

教練煩惱，射手一樣頭痛。國米嘅莫路伊卡迪對薩斯索羅連中三元威風八面，可惜近4場聯賽食白果，經過國際賽檔期休息，可以抖足精神落場搏殺。希古恩反而忙到氣咳，跟隨阿根廷國家隊去咗亞洲，熱身賽出戰巴西落場近30分鐘，對香港入2球就踢足全場，兼埋舟車勞頓，體力恢復或者爭啲，希古恩喺今屆歐霸盃入咗兩球，但聯賽仲未開齋，反而荷西卡利祖省咗4粒仲Fit過佢添，要爭氣喇。兩隊上季對壘0:0，今場睇落亦似和局居多，佢哋周中仲要應付歐霸盃，國米迎戰聖伊天，拿玻里作客瑞士年青人，隨時齊齊留力。