魯賓卡山勝在有Heart

猪拉多纳

搞波好講Heart，俄超魯賓卡山就係一隊有野心嘅球隊，今日佢哋小休復出，主場迎戰摩度維亞，1.5倍主W雖則冇乜肉食，但係勝在夠穩陣。

（開賽時間：周一晚11:30）

魯賓卡山係乜東西，恐怕唔係咁多球迷有認識，其實呢支球隊嚟自喀山（Kazan），只係足智彩從俗譯卡山，當地盛產紅寶石（Rubin），又係俄羅斯生產常規動力潛艇嘅基地，所以意譯加地名應該叫喀山紅寶石至啱。呢班波曾經响08、09年稱霸俄超，近年投資收縮謝咗啲，不過家陣佢哋又密謀重新振作喇，總經理加拉耶夫早兩日宣布咗個增資計劃，着手拉攏當地企業出錢，希望省番靚個招牌。

事實上魯賓卡山係間職業化程度唔錯嘅球會，仲好識得宣傳添，好似今場波係國際賽期後第一戰，佢哋就搵咗龍門尼治哥夫扮清潔工人响看台抹櫈，拍咗段片呼籲Fans記得入場睇波，假如增資順利，魯賓卡山真係發到圍唔奇。

講番今日場波，魯賓卡山、摩度維亞兩隊趁住國際賽空檔，分別拉隊去咗德國同土耳其集訓，完全冇偷懶。雖然佢哋各自有3、4個球員畀白俄、黑山、伊朗、摩爾多瓦國家隊徵召咗去踢太公波，練波唔齊人，不過啲傷兵就得益喇，例如魯賓卡山個中場簡奴尼哥夫已經好番晒，今日絕對踢得，以佢哋主場4戰不敗，過去兩鬥摩度維亞又全部贏波，呢個主勝十拿九穩，唔好嫌熱呀。