巴塞做東又開大騷

猪拉多纳

今屆歐聯分組再遇阿積士

歐聯F組賽事，西甲巴塞隆拿主場迎戰荷甲阿積士，兩軍上季分組賽碰頭，巴塞主場憑美斯連中三元大勝四比○，今次再度交手，巴塞贏面仍然睇高一線，但考慮到巴塞防線唔多穩陣，攻力唔錯嘅阿積士有權入波，讓球主客和巴讓二球太多，度士寧揀1.88倍入球大。

（有線62及202台周三凌晨2時45分直播）

巴塞今季踢咗八場西甲冇失過波，點解度士話佢哋後防唔穩陣？大家睇吓佢哋嘅對手，除維拉利爾實力較強外，其餘利雲特、艾爾切、畢爾包都係榜下游隊伍，根本對防線考驗有限，而且睇番比賽過程，巴塞其實好多場都有先失波危機，作客維拉利爾上半場畀人壓住嚟攻唔在講，上周末聯賽主場對伊巴，對方前鋒上半場一次單刀唔入、一次扭過門將射空門出界，巴塞唔先失波真係好夠運。
客軍主攻啱晒嘴形

再細心睇吓巴塞防線，新加盟嘅法國中堅馬菲奧冇速度又冇位置感，碧基近年水準大跌Watt，馬斯真蘭奴最佳位置始終係防中，新仔馬斯巴查又輸經驗，無論中路起用咩組合，始終畀唔到度士信心。

當然，巴塞最煞食之處始終係前鋒，美斯跑動冇以前咁多唔代表佢冇威脅，只係佢更懂得留放，至於負責拉開防線嘅「跑腿」工作就分畀尼馬。尼馬今季演出真係值得一讚，勤力之餘亦比上季更多參與進攻，投入感更強。尼馬上季喺西甲全季只係入九球，今季聯賽上陣七次已入八球，入球數字比美斯仲要多。有西班牙傳媒報道，尼馬之所以咁弗，全因球會特別對佢加強肌肉訓練，增強個人對抗性，依家嘅尼馬比起一年前明顯大隻咗好多。

今場另一焦點係阿積士教練法蘭迪保亞重返魯營球場，自從法蘭迪保亞轉做教練後，主要師承巴塞嘅主攻踢法，分組賽面對另一勁旅巴黎聖日耳門都取得入波，冰島前鋒史基賀臣、波蘭射手梅歷克喺早前歐國盃外圍賽都有好表現，配合丹麥孖寶舒奧尼及盧卡斯安達臣，絕對有機會在主隊身上偷雞。

度士醒你

山度士

前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。