巴塞贏三粒無難度

猪拉多纳

阿積士作客唔識守！

歐聯分組賽又開波，今晚巴塞隆拿主場對阿積士，巴塞有尼馬弗到漏，美斯更加踢到出火，日前喺聯賽對伊巴拒絕被調離場，恨入波恨到出面，而阿積士唔識守好易被炒起，就算巴塞讓「-2」都要捧1.92倍「讓球主勝」！

（有線62及202周三凌晨2:45直播）

今季巴塞由新教練安歷基執教，打法上已放棄哥迪奧拿時代嘅無限互傳taki-taka，取而代之係加強邊線進攻，或者球迷未必鍾意，但暫時效果又真係幾好，日前巴塞喺聯賽以3:0砌低伊巴，已經係佢哋今季第4次淨勝對手2球以上。

巴塞改變打法，最大得益者係尼馬，佢開季至今已攻入9個入球，包括對CF格蘭納達連中三元，連帶喺巴西國家隊都踢到曉飛，對日本食出大四喜，阿積士教練法蘭迪保亞球員時代都踢過巴塞，應該好清楚對手依家有幾惡。
沙維留力國家打吡

最重要係，美斯日前對伊巴入波後，被西班牙電視台影到佢拒絕被換走，不過佢當時豎起手指公向教頭安歷基示意，睇落只係想趁西甲國家打吡前打破西甲入球紀錄，撞啱阿積士對上3年3次作客巴塞或者皇馬，至少淨輸3球，唔識守睇怕又會變炮灰，巴塞就算收起沙維留力西甲打吡、艾迪安奴又養傷都唔使驚。

歐聯F組