限米煮限飯高普識煮飯

猪拉多纳

多蒙特主帥高普今季教隊波喺兩大比賽嘅戰績有好大分別，歐聯兩戰全勝排榜首，德甲嘅水準反而唔太穩定，但筆者好理解呢個情況。因為高普係一個有料、識得精打細算同懂得部署攞成績嘅教練，始終「蜜蜂兵團」係限米煮限飯，唔似拜仁慕尼黑、曼聯、巴黎聖日耳門咁可以嘥好多錢去買球員。
專注歐聯博16強先

高普明白聯賽係漫長之路，倒不如季初專注歐聯入咗16強先，然後喺1月先再買人增兵都唔遲，始終要喺德甲攞2、3、4名佢絕對係有把握做到嘅。高普呢種教法係睇餸食飯同知己知彼，唔會自暴其短，呢啲招數喺職業足球如果球隊唔係太富貴嘅情形下，係可行嘅。

Peter當年教東方都遇過呢啲情況，需要球員時先買人，總好過成隊波有人滿之患，同埋亂咁使錢邊度唔妥就走去增兵。所以，「蜜蜂兵團」今晚踢第3場歐聯，作客土耳其嘅加拉塔沙雷，Peter相信高普會以穩守突擊，希望攞1分為主。因為多蒙特今仗攞到1分，加拉塔沙雷極其量攞埋呢分都只得2分仲排喺榜末，可以踩咗1隊落去，而自己最緊要唔好輸波。Peter覺得呢種部署方式，會係多蒙特教頭高普今晚所做嘅。
金句：多蒙特今非昔比還是專注強攻歐聯呢？