紅鑽雷厲風行搶分

猪拉多纳

畀飛腳追到氣咳

日職進入倒數階段，今晚開快車九場比賽6時同時間開波。現時聯賽一哥浦和紅鑽上場意外不敵仙台維加泰，榜首優勢縮窄到得番四分，嚟緊仲要硬撼幾支爭標對手，今日返主場迎戰全日職作客成績最曳嘅甲府風林，三分志在必得，主隊讓半一捧上盤。

（有線61及201台周三晚6時直播）

浦和紅鑽上場作客仙台維加泰爆冷輸2比4，已被聯賽七連勝嘅大阪飛腳追到得番四分差距，由於紅鑽嚟緊「魔鬼賽程」要硬撼現時排第二至四嘅大阪飛腳、烏棲砂岩同鹿島鹿角，以飛腳近期後上勢頭，紅鑽對住下游隊伍實在再冇失分空間。翻查紀錄，原來紅鑽今季聯賽從未試過兩連敗，而且對上五次輸波後翌仗例必全取三分，足證球員心理質素佳，唔易被一場敗仗打沉。
甲府風林作客任劏

甲府風林現排聯賽榜第15位，只比尾二嘅大阪櫻花多三分，極需搶分護級，可惜佢哋14場作客只贏得一場，成績仲差過排榜尾嘅德島漩渦，而且佢哋今季七場作客敗仗全部食蛋，包括輸畀現時聯賽榜二至五位球隊，作客一哥注定凶多吉少，主隊讓半一至少執半個盤，上盤值博。

其他同時直播場次，神戶勝利船主場鬥鹿島鹿角，鹿角係日職作客成績最好及入波最多嘅球隊，為保爭標希望會照搶攻，捧大盤。（有線62及202台直播）最後川崎前鋒主場鬥鳥棲砂岩，砂岩踢法實而不華，作客硬淨唔易輸，捧讓球客勝。

（有線64台直播）