殘兵游勇博大霧

猪拉多纳

歐聯阿仙奴作客安德列治

傷兵滿營嘅阿仙奴，將喺今晚歐聯分組賽D組作客鬥比利時球隊安德列治。「兵工廠」依家兩戰得三分，為求盡早取得出線資格，今仗一定會踢得更進取務求贏波而回。而安德列治踢咗兩場分組賽只得一分，想出線今仗只能贏波，細鬼睇好今仗會有唔少入波，一於捧大盤！

（有線64及203台周四凌晨2時45分直播）

阿仙奴近期表現反覆，可以話嚇死一眾「廠迷」，尤其係剛戰主場對侯城幾經辛苦先喺完場前逼和對手，真係令人難以相信。「兵工廠」搞成咁主要原因係太多傷兵，奧斯爾、迪保治、哥斯尼、基奧特等齊齊因傷缺陣，而韋舒亞及艾朗藍斯亦上陣成疑。阿仙奴今仗更有正選門將施捷斯尼停賽，加上哥倫比亞國腳門將奧斯賓拿因傷無法上陣，只能以第三號門將達米安馬天尼斯把關，防線實力進一步被削弱下，面對主場出擊嘅安德列治相信難以保住清白之身。
安德列治準備駁火

安德列治近年踢歐聯嘅戰績都係麻麻，上仗主場面對德甲勁旅多蒙特更淨吞對手三蛋，表現令人難以接受。安德列治現時喺D組兩戰只得一分，要出線今仗實在不容有失，球隊前線主力如馬迪亞斯蘇亞雷斯及米卓域克其實頗具質素，面對防線「穿窿」嘅阿仙奴相信有力入波，細鬼認為今仗入波唔會少，大盤不容錯過！