多蒙特讓得辣咪搞

猪拉多纳

黑氣纏身嘅德甲勁旅多蒙特，今晚喺歐聯D組作客土超班霸加拉塔沙雷，「蜜蜂兵團」早排出現傷兵潮導致狀態飄忽，搞到聯賽跌到落下游，既然首兩輪歐聯贏晒，今仗實在唔需要太搏，作客仲要讓到半一咁多簡直離晒大譜，斯維力撐加拉塔沙雷下盤。

（有線62及202台周四凌晨2時45分直播）

人衰行路打倒褪，多蒙特就係最佳例子，早排香川真司、馬高列奧斯、米希達利恩、紐尼沙軒、曉姆斯一下子齊齊受傷，連同根度簡、巴拉斯塞高斯基等長期十字兵，陣容天殘地缺，主帥高普左度右度都冇計，近五年來首次出現連續五場聯賽未贏過，依家衰到跌落第十四位，只係多尾三嘅漢堡一分，真係堅黑仔。雖然香川仔、馬高列奧斯、米希達利恩、曉姆斯已經復出，連抖咗四百三十日嘅根度簡喺上仗不敵科隆之役正選披甲，但佢哋狀態明顯未上力。
加拉塔沙雷主場夠惡

相反加拉塔沙雷有回勇迹象，射手布拉卡爾馬斯及中場史奈達頻頻士哥，協助球隊喺土超三連勝升番上次席，佢哋喺「地獄主場」出擊往往打高一皮波，喺歐聯只得一分嘅情況下實搏甩髀。由於多蒙特頭兩場歐聯全勝擸晒六分，今仗唔輸都可接受，倒不如留番啲力喺聯賽搶分好過喇，況且加拉塔沙雷絕非善男信女，主場受讓半一實在筍到暈，呢個下盤咪走寶。