射手天與地 皇馬滅利記

猪拉多纳

連續8場入波vs 8戰入得1球

今晚歐聯上演重量級大戰，利物浦主場迎戰皇家馬德里！再度踏足歐聯舞台嘅利物浦，首兩輪分組賽表現麻麻，皆因孭飛前鋒巴洛迪利死晒火，踢咗8場只入得1球，相反皇馬王牌C朗就已經連續8場有士哥，兩隊射手近況差天共地，今晚梗係熱捧皇馬1.7倍客W啦！

（有線61及201、中央5台周四凌晨2:45直播）

利物浦今季放走王牌蘇亞雷斯，雖然前線補入巴洛迪利，加埋史達寧同史杜列治組成三叉戟，奈何把握力始終唔及上季。紅軍上場英超造訪昆士柏流浪，以為易食啦，點知都係飽食驚風散，比賽尾段兩度被追和，最後靠對手兩個烏龍波先險勝3:2咋，陰功！
史獨繼續抖 贏QPR靠運

對住QPR都踢得咁辛苦，家陣對皇馬點頂呀？最濕滯係史杜列治又再受傷肯定缺陣，即係話對昆士柏一戰近門超級Miss、完全冇態嘅巴洛迪利又一次要肩負攻擊重任。事實上自「史獨」養傷後，「腦殘」喺呢8場波只入得一粒咁大把，試問利物浦嘅鋒力邊信得過吖？
巴利打柴 艾斯高都掂

冇錯，皇馬今場亦有加里夫巴利打柴，但「替工」艾斯高一樣係有質素嘅球員，難得擔正肯定夠晒搶韁。不過最重要嘅，始終係王牌C朗夠Fit，呢位葡國「萬人迷」已經連續8仗有士哥，頭頂腳踢樣樣有，今晚無論拍住賓施馬定抑或查維亞靴南迪斯都一樣夠照。再講，「銀河艦隊」喺歐聯小組兩戰兩勝，近7仗全勝兼攻入32球，火力咁得人驚，對住防線不穩嘅利物浦，真係「伊絲W」啦！
Data King：皇馬10戰未曾落後

‧兩軍史上3度對壘，利物浦全勝兼不失一球。

‧利物浦近20仗僅得2場保持清白之身。

‧皇馬近10戰半場從未落後，開出7次「半贏」及3次「半和」。
乜都玩錦囊：兩邊鬥開火玩「大」佢

「銀河艦隊」近7仗喪入32球，撞啱利物浦防線係由粗枝大葉嘅洛夫雲孭飛，C朗唔省多兩粒都對唔住自己啦！不過咁，利物浦近3次鬥皇馬都有波入，相信今仗入波唔會少，1.52倍大趁熱食。
盤路解碼

皇馬連續9場開出「半場大」。