慕遜加柏大戰前清素

猪拉多纳

昔日德甲霸主雄心再起

歐霸盃分組賽第三輪，A組德甲慕遜加柏主場迎戰塞浦路斯球隊阿波羅利馬素，慕遜加柏經過兩場分組賽仲未開齋，但佢哋喺德甲愈戰愈勇，嚟緊周日會同拜仁慕尼黑上演榜首大戰，球隊近期踢起信心，今晚除要贏波保持出線機會外，亦希望大勝一仗增強氣勢同拜仁鍊過，面對同組最弱對手大勝冇難度，捧讓球主勝。

（周五凌晨3時05分開賽）

慕遜加柏今季喺德甲順風順水，至今保持8戰不敗高踞次席，僅以4分落後榜首拜仁，球隊上次開季8輪不敗已經要追溯到1976至77年度球季，當季佢哋更加贏得德甲冠軍。事實上慕遜加柏喺七十年代曾經係德甲霸主，喺70至77年共5度封王，亦兩度捧走歐洲足協盃（歐霸盃前身），嚟到今季，球隊經過季前幾個成功收購同教練法夫爾嘅努力，再有中興迹象，難怪球會經理艾伯尼喺上輪聯賽大勝漢諾威後表示：「下輪聯賽主場對拜仁係期待已久嘅榜首大戰，雖然對手實力強大，但我哋有信心將不敗紀錄延續落去！」不過慕遜加柏唔會因此而喺今仗留力，皆因佢哋對歐霸盃同樣充滿野心，之前兩輪分組賽都喺佔盡上風下和波收場，今場變後非勝不可，慕遜加柏更希望大炒對手，喺大戰前壯聲威。
阿波羅利馬素級數有限

慕遜加柏教練法夫爾向來唔鍾意大幅輪換，但球隊今屆喺頻密賽程下依然交出好表現，尤其箭頭麥斯古斯傷愈復出後，迅速拾佳態，佢同另一大勇鋒將拉菲爾基達奴合作，威力唔講得笑！

塞浦路斯球隊阿波羅利馬素實力無疑係A組最弱一隊，首仗爆冷喺主場險勝瑞士蘇黎世只因對手季初未上力，跟住次輪作客慘吞西甲維拉利爾4蛋，證明級數有限，陣中最有威脅球員係30歲阿根廷前鋒辛戈同26歲西班牙進攻中場曉高盧比斯，不過兩人都唔係國腳級數，今晚作客去到保路西亞公園球場等做炮灰。

Alwin

Hoffenheim CL Winner

國籍：德國

自小是史浩克擁躉，居於辛斯海姆，即賀芬咸大本營，對兩軍有深入資訊，除撰寫球評外，亦在個人博客hoffeclwinner.blogabet.com 提供免費足球推介。