撐不來梅贏波收科

猪拉多纳

開季8戰不勝 主帥聞到魷魚香

德甲榜尾雲達不來梅上場作客慘吞拜仁6蛋後，傳出主帥杜治即將落鑊嘅消息，雖然球會好快出嚟闢謠，但相信聞到魷魚香嘅杜治，會好好把握今晚喺主場鬥科隆嘅「最後機會」。足智彩今仗開出平手盤，一於撐1.96倍嘅主隊贏波反彈。

（有線61及201周六凌晨2:30直播）

不來梅今季出閘脫腳，連續8場聯賽未贏過，上場慘吞拜仁6蛋之戰連1次正式射門都冇，咁樣刷新德甲紀錄認真羞家。依家杜治帥位不穩，前史特加教練史堤芬斯早兩日乘機出嚟抽水，暗示自己有意接掌不來梅帥印。如果杜治唔想執包袱走人，今晚肯定要打醒十二分精神先掂。
科隆火力唔掂 雙箭頭陷入球荒

雖然不來梅正值低潮，好在一班球員並無氣餒。主力射手迪山度話球隊上下會保持正面心態面對困境，仲話嚟緊嘅比賽都會當決賽咁踢，聽落鬥心十足。講真，不來梅主場一向食住科隆，已經連續6次喺主場砌低對手，難怪班球員咁有信心今場可以搶到分。而且佢哋今季試過攻破禾夫斯堡同利華古遜等前列球隊大門，都叫有足夠本錢贏波反彈。

另邊廂嘅科隆暫時排喺德甲第11位，表現算係不過不失。但要留意佢哋今季踢咗8場聯賽，當中5場波食白果，反映鋒力欠穩。而且陣中又冇1個信得過嘅「士哥拿」，一對箭頭大迫勇也、安東尼烏查齊齊陷入球荒，今戰對住矢志贏波開齋嘅不來梅，相信唔係咁易搵到食。