阿古路殺得性起 曼城2.22倍「讓客」扑錘

猪拉多纳

堂堂英超衞冕隊伍，曼城出到歐聯大舞台一直踢唔出水準，周中造訪同組牌面最削嗰隊莫斯科中央陸軍，早早領先兩球諗住實食冇黐牙啦，點知最後都係和波失分，班球員唔嬲就假喇！今晚「藍月亮」作客韋斯咸，阿古路呢期入球停不了，「錘仔幫」撞正成肚火嘅曼城，都算唔好彩咯，捧2.22倍「讓球客勝」。

小妹都知道，唔少人都叫曼城做「門口狗」，不過我依然對呢班波投以信心一票，畢竟曼城新季英超走勢真係幾猛，上輪以4:1大炒熱刺場波勁有霸氣，贏波功臣阿古路仲食出「大四喜」，開咧至今已經喺歐聯、聯賽同英聯盃累積轟入10個「士哥」，並且超越同胞泰維斯榮升「藍月亮」英超入球最多球員，阿「Kun」狀態勇成咁，韋斯咸點頂得住先！
曼城想續借林柏特

曼城尋日主動邀請紐約FC去佢哋個新基地，備戰新一季美職聯賽，咁好死皆因想續借林柏特。呢位曼城9月份最佳球員雖然養緊傷，今仗繼續陪拿斯尼一齊睇波，不過由占士米拿、大衞施華同耶耶托尼合組嘅中場線攻守兼備，一樣夠照。

主場韋斯咸射手迪亞法沙高最近猛咁入波，帶領球隊錄得兩連捷，但查實對手只係昆士柏流浪同般尼兩隊二打六，唔足以反映球隊嘅真正狀態同戰鬥力。況且「錘仔幫」一向都畀曼城食住，就講上季吖，雙方喺聯賽同聯賽盃4度交手，曼城都贏晒並總共轟入14球，睇怕今季個劇本都係差唔多。
Data King：曼城近10次對賽不敗

‧兩軍近10次交鋒，曼城取得8勝2和不敗佳績。

‧以2.5球中位數計，雙方近10次對壘開出7大3細。

‧「錘仔」箭頭迪亞法沙高連續5場英超取得進帳。
盤路解碼

「藍月亮」近8次擊敗韋斯咸，每場最少攻入對手兩球。