莫連奴級數冠絕英超

猪拉多纳

「寸王」莫連奴去年回歸車路士執教，卻一啲都唔心急，話明首季未必攞到冠軍，今季佢執過班波後去蕪存菁，又簽入分量十足嘅射手「迪哥」迪亞高哥斯達，立即清風送爽如魚得水，聯賽8戰只曾1次打和失咗兩分，其餘7場贏晒，於英超領放。

假如你話莫連奴並非世界第一主帥，Peter就認為佢係最靠得住嘅教頭，因為其他英超球隊及領隊，根本唔係佢嘅級數，聯賽仲有漫漫長路，依家講車仔奪冠仍言之尚早，但只要「迪哥」唔好長期受傷患困擾，任何名牌球隊要從後趕上都絕非易事。

今晚重頭戲當然係車仔火併曼聯喇，後者唯一優勢係有主場之利，領隊尹戈爾仍未搵到一個可靠而常用嘅陣式，尤其係中後場嘅人選方面，猶如星期美點，只得其荷蘭同胞戴利白蘭特較為可靠。

以「寸王」咁功力深厚，相信今仗會有兩手準備，若果「迪哥」缺陣的話，莫帥應會排出穩陣行先嘅陣式，希望起碼攞1分，倘若「迪哥」趕及披甲，莫帥深明紅魔後防不穩嘅問題，隨時先發制人想擸晒3分，因此「迪哥」上陣與否，會成為車仔戰術取向嘅關鍵。
金句：當你係大師級嘅教頭，凡事就易辦事得多