AC費倫鬥攻演入球騷

猪拉多纳

今晚意甲好戲碼，AC米蘭主場對費倫天拿，兩位昔日意國著名射手恩沙基、蒙迪拿執教鞭後首次交鋒；兩人球員時代入波無數，成為教練後亦崇尚進攻足球。AC主帥恩沙基擁有大勇嘅本田圭佑，呢位日本國腳今季七戰入六球，腳風極順。費倫嘅哥倫比亞翼鋒古達度今屆世盃表現突出，傳射能力俱佳。兩隊將帥皆屬好攻之人，Mic少捧入球大。

（TVB 301周一凌晨3時45分直播）

AC搵來青年軍教練恩沙基領軍，注入新景氣，皆因呢位四十一歲少帥冇包袱，可以大膽試用新戰術，改踢四三三陣式，將本田圭佑改造成右翼，效果非常好，充分發揮出呢位日本國腳嘅射門能力，甚至連「失意軍人」文尼斯都翻生。結果首七輪聯賽，AC攻入十六球，屬各隊之冠，有姿勢有實際。
保羅普巴續約為祖記賣命

四十歲嘅蒙迪拿已有三年教波經驗，成績相當不俗，近兩季都率領費倫獲得第四位。蒙迪拿亦喜歡用三前鋒陣式，能夠勝任左右兩翼嘅古達度踢法好有侵略性，既可以自己突破搵食，亦可為隊友鋪橋搭路。AC防守麻麻，未必睇得實呢位快翼，費倫入波機會亦高。

另一場意甲，祖雲達斯收到喜訊，成功同中場主力保羅普巴續約至2019年，年薪達450萬歐元，屬於隊內最高。呢位法國新星近期受到歐洲各大球會垂青，依家落實續約，可以專心為祖記搏殺，絕對係呢支意甲勁旅之福。祖雲達斯今晚主場對巴勒莫，保羅普巴勢必落力顯身價，直取讓球主勝。

（TVB 301周日晚10時直播）