里昂主場攞1分冇壞

猪拉多纳

馬賽求破紀錄壓力大

馬賽季初表現勢如破竹，10戰累積25分高踞法甲榜首，不過佢哋今晚要造訪里昂，想爭取破球會紀錄嘅9連勝，實在係一大考驗！客途搶分已經唔係易，仲要背負咁重要嘅歷史使命，壓力千斤墜，馬賽球員真係頂得住冇呀？

（TVB302周一凌晨4:00直播）

馬賽由8月尾開始一直贏，依家已經平咗1937同1998年度創下嘅8連捷紀錄，值得一提嘅係呢8場佢哋只失3球，單計上半場仲保持緊清白之身添，防守夠晒集中，功勞好大嘅中堅尼古拉斯尼古路，賽前話PSG依然係奪標大熱，相比之下馬賽陣容弱好多，明顯係幫班隊友減壓。
哥古夫傷愈進攻瓣數多

或者真係壓力太大，以10個入波喺射手榜領先嘅基格納近幾場都好躁底，佢入波心切頻頻埋怨隊友唔交波或者嘥機會，睇嚟教練比爾沙都要諗吓點樣調整班人嘅作戰心態，否則爭標前途隨時好似佢上場坐落杯熱咖啡度咁，搞到一褲到係。

至於近6戰不敗嘅里昂，亦有拿卡錫迪入咗8球做緊射手榜二哥，狀態唔會差得過基格納。上場佢哋5:1大炒蒙彼利埃，哥古夫傷愈復出正選兼入兩球，有佢壓陣里昂進攻瓣數多好多，就算加連尼亞、穆罕默杜達保及古艾達科芬拿繼續養傷都冇有怕。呢啲大戰往往係考驗球員心理質素，里昂目前形勢攞1分都唔係壞事，如果放得開懷抱，主場出戰坐和望贏。