多蒙特不來梅恰細路

猪拉多纳

落難孖寶盃賽遇乙丙組仔

德國盃第2圈今晚免費電視有直播，德甲「落難孖寶」雲達不來梅、多蒙特齊齊獻「細」！雲達不來梅今季衰到貼地，10戰都未能於法定時間90分鐘內贏波，教練杜特啱啱被炒，一切洗牌重來，今晚德國盃作客丙組仔真尼沙，亦未必咬得入對手。（無綫翡翠台周三凌晨2時直播）至於「蜜蜂兵團」多蒙特三線作戰踢到殘，作客乙組仔聖保利恐怕煲魚生粥，亦屬細盤首選。

（無綫明珠台周三凌晨3時30分直播）
不來梅新帥首務止瀉

雲達不來梅近4季淪落到只能喺德甲下游掙扎，上仗聯賽輸畀科隆後，教練杜特即時被炒，會方只係提升青年軍教練史基普尼克領軍，以及昔日名將芬寧斯擔當副手，恐怕即時難有起色。由於不來梅現時仲喺聯賽包尾，史帥首要任務係幫球隊脫離降班區域，根本冇餘力兼顧盃賽。

事實上，不來梅第1圈對住第4級別聯賽球隊伊勒迪森，都要踢到加時先至淘汰對手，更何況球隊現時水深火熱，唔好話要贏，連想入波都唔易。

對手「丙組仔」真尼沙火力同樣弱雞，近7仗有5仗冇波入，應會主守博大霧，入波機會亦唔大。兩邊都唔識入波，1.95倍入球細係投X不二之選。
多蒙特傷疲見好就收

另一場同樣係唔同級別對碰，多蒙特今季多線發展慘受傷兵困擾，聯賽成績大倒退，雖然部分主力已復出，但教練高普為免佢哋再受創，今場盃仔應會派副選出戰。多蒙特最大目標始終係德甲同歐聯，德國盃但求贏波收貨，唔會浪費氣力炒聖保利，細盤好路。