紅軍讓波唔啱素

猪拉多纳

巴神「神經刀」仲要顧歐聯

周中喺英聯盃入波助利物浦晉級嘅巴洛迪利，今晚於英超早場帶領紅軍作客硬撼「喜鵲」紐卡素，呢位神經刀一啟動「聯賽Mode」即死火信唔過，況且紅軍又有歐聯後顧，實在讓唔起全面回勇嘅紐卡素，寧買當頭起，斯維梗係揀番「喜鵲」讓球主勝啦！

（now 621周六晚8時45分直播）
紐卡素90後輪流發威

能夠稱得上係神經刀，點會咁易畀你估到，之前陷入8場入球荒變地底泥嘅巴洛迪利，上周中英聯盃16強對史雲斯落後一粒時臨危受命，後備入替卻大顯身價近門扳平成晉級英雄之一。不過，每當巴神畀到希望大家嗰陣，往往都會令人失望，雖然隊友荷西安歷基及蘇索賽前錄咗片大唱：「馬里奧（巴洛迪利）最勁，馬里奧最勁，Ole！Ole！Ole！」特登為佢加油，但呢位意大利前鋒今季重返英超後，至今踢咗7場聯賽都仲食緊白果，反而喺歐聯同英聯盃就已經相繼開齋，你都咪話唔邪。

人唔會一世行衰運，紐卡素主帥柏杜總算頂住季初低迷帶來嘅倒台壓力，逐漸帶領球隊從谷底爬番上嚟，唔經唔覺已經連贏3場，儘管依家仍有柏比斯施斯、大衞辛頓、施安迪莊等大批傷兵，好彩路蘭度艾朗斯、艾約斯佩雷斯、雷米卡比拿及杜密特等90後輪流發威，初生之犢不畏虎，為「喜鵲」注入朝氣同信心，周中英聯盃佢哋用呢班後生仔，作客照贏億萬大軍兼上屆盟主嘅曼城，令士氣大振。
留力鬥皇馬唔敢去盡

此外，利物浦於歐聯3戰僅1勝，出線形勢都幾惡劣，嚟緊周中又要作客大戰皇馬，加埋射手史杜列治繼續因傷倦勤，今仗未必會去盡，讓球主客和「喜鵲」仲受讓一粒咁筍，讓球主勝咪錯過。