迪哥復出 車仔搵QPR出氣

猪拉多纳

(六)33 車路士 Vs 昆士柏流浪

英超「一哥」車路士上輪畀球證累到贏唔到曼聯，谷埋谷埋成肚氣，今仗返到主場梗係想搵防守弱雞嘅昆士柏流浪（QPR）嚟發洩啦！車仔唔單止有「魔獸」杜奧巴腳風極順，連成個英超最得人驚嘅前鋒迪亞高哥斯達都有望復出，車仔讓到兩球都唔怕追喇！

（now 621周六晚11時直播）

其實真係諗唔到車仔有咩原因係贏唔到QPR咁多球，法比加斯、夏薩特同奧斯卡杜斯山度士組成「屈機」中場三核，前面有連續3場都入波嘅杜奧巴，或者係入咗9個聯賽入球嘅「迪哥」，你叫QPR條防線點頂？係，車仔上場英聯盃對住乙組仔贏得肉酸，但心水清嘅球迷都知車仔留力，場波冇乜參考價值；係，車仔下周中要踢歐聯，但對手係上場大炒佢6球嘅馬里博爾喎，又點使為呢場而留力呀？
昆士柏流浪負面新聞多

QPR場內外都勁多問題，教頭夏利列納同中場泰拉拔嗌交嗌到上頭條，里奧費迪南就衰口臭而被罰停賽3場，今場要做觀眾。咁多負面新聞，球隊士氣又點會好呀？雖然話佢哋上場止瀉成功，擊敗阿士東維拉2比0，但今場對手係勁到爆嘅車仔喎，輸3球都算少啦！