55年打波生涯告終

猪拉多纳

筆者踢足球、打籃球、打棒球甚至玩埋美式足球已經55年啦，卒之尋日真係要「認命」宣布高掛球靴。點解呢？因為右腳韌帶ACL半月板冇晒；左腳足踝葫蘆骨生骨刺，惟有完全退役，希望唔使做手術可以仍然好似正常人咁行得。波唔踢得咁點算？咪做足球大使仍然捧自己母會東方場，同埋做荃灣嘅足球總監囉！世界上永遠都有體育可以推廣，當然專欄要繼續寫，波就要繼續講啦！
博曼聯和波賺餐晏仔

今晚筆者會講意甲AC米蘭主場對巴勒莫嘅賽事，但係英超重頭戲係「曼市打吡」喎！近況唔好嘅「藍月亮」曼城竟然被大家認為可以有機會贏曼聯一球。老實講，睇返最近兩隊嘅狀態同戰意，曼城點可以咁輕易擊敗紅魔呀。話晒紅魔主帥尹戈爾而家都唔再打3個後衞，好似上場對車路士咁人人走多步，就算喺一兩場嘅過度時期，唔係防中嘅桑馬達同贊奴沙呢啲年青球員肯定都會走多兩步，喺呢個非常時期都會識得防守，加埋門將迪基亞都唔係「善男信女」，所以呢場波既然人人都係睇好「藍月亮」，筆者反而覺得紅魔分分鐘都有機會和波。若然小吼曼聯受讓，都可以贏波兼賺餐「晏仔」添！
金句：

雙腳不靈並非世界末日